利華古遜執到寶　力爭留住拜仁借將

利華古遜今季表現一鳴驚人，有望成為德甲、德國盃、歐霸盃「三冠王」，教練沙比阿朗素早前宣布留隊之後，開始為下季組軍做準備，首要工作係爭取留住向拜仁慕尼黑借用嘅後衞史坦尼錫。

現年24歲嘅史坦尼錫屬於克羅地亞國腳，但其實佢喺德國出世，2017年加盟拜仁慕尼黑青年軍，3年前獲提升上一隊之後，上陣機會唔多，上年夏天被借去利華古遜，為期1季。拜仁變相「助攻」勁敵，因為史坦尼錫加盟利華古遜之後，有出色表現，唔止防守穩陣，進攻上亦有貢獻，各項賽事上陣28場射入1球及3次助攻。

根據德國《圖片報》爆料，由於借用合約不含買斷條款，利華古遜計劃今夏再次向拜仁提出續借史坦尼錫，甚至正式收購佢。史坦尼錫話現時只會專注為利華古遜爭標，未想過重返拜仁嘅事情，似乎好享受效力利華古遜嘅日子，相信佢願意繼續跟隨沙比阿朗素搵食。