曼聯總監離任　坦哈格失兩大後台

英超勁旅曼聯嘅高層改革繼續進行，效力球會11年嘅足球總監梅托周二(9日)宣布離職，英國傳媒指梅托嘅離開，令領隊坦哈格失去喺曼聯最後嘅支持者，佢喺「紅魔鬼」嘅帥位更加岌岌可危。

梅托喺2013年加入曼聯，11年來由足球發展主任升到足球總監，不過佢效力咁耐，曼聯就霉足咁耐。自拉特克利夫入主後，已盛傳梅托將被「燉冬菇」，預計可能轉任其他崗位，但曼聯周二就宣布梅托正式離開。曼聯主席之一嘅祖爾格拉沙表示：「經過11年來共同努力，我哋認為係時候要實行新管理架構，梅托永遠係曼聯嘅朋友。」

梅托同上年底離任嘅前CEO李察阿諾特，係2年前親自飛去阿姆斯特丹面試坦哈格，最後決定請佢執教嘅人，過去2年亦多次公開力撐坦哈格，據英國《太陽報》報道，隨住李察阿諾特同梅托先後離開，坦哈格已失去隊內最重要嘅後台，下季留隊機會再度下降。