麥巴比射門0中龍　3大金球獎熱門齊失魂

歐聯向來係巨星表演舞台，不過隨住C朗拿度同美斯退下，一眾新世代「金球獎」熱門都表現唔出統治力，繼艾寧夏蘭特同祖迪比寧咸後，巴黎聖日耳門(PSG)前鋒基利安麥巴比亦喺歐聯8強大戰「隱形」，對巴塞隆拿一仗全場0次中龍攻門，表現令人失望。

周三(10日)皇馬對曼城嘅大戰，祖迪比寧咸同艾寧夏蘭特都係錄得1次攻門，演出非常淡靜，估唔到麥巴比都步佢哋後塵，今仗3次射門全部唔中目標，係佢近12場歐聯主場首次「0中龍」；另外，麥巴比今場只有44次觸球係正選球員中最少，而且仲有13次甩波紀錄，加上3次被吹越位，完全表現唔出「新球王」嘅風範。

PSG教練安歷基賽後拒絕評論麥巴比今場演出，不過為法國電視台評述嘅紅星教練比耶就話：「麥巴比踢得好平庸，作為進攻核心係不能接受，但最大責任係安歷基，佢今季對麥巴比嘅使用，令佢唔夠狀態去應付高強度賽事，當然麥巴比都應該踢得更好，但我見佢今場被孤立同踢得唔太開心。」