西甲成大贏家　起碼可佔一席決賽？

歐聯8強首回合4場大戰結束，西甲球隊成為大贏家，3隊取得2勝1和，包括位處同一條淘汰線嘅巴塞隆拿、馬德里體育會一齊贏波，若然兩隊最終晉級，就會喺4強碰面，令西甲球隊可以鎖定一個決賽席位。

西甲球隊今屆歐聯戰績彪炳，8強之中佔3席，加上3隊抽籤後，避過交鋒，有望一齊殺入4強。目前以巴塞隆拿晉級機會最樂觀，首回合作客贏巴黎聖日耳門3比2，次回合有主場之利，力保勝果機會高唱入雲。至於馬體會首回合主場以2比1擊敗多蒙特，主帥施蒙尼擅於佈防，次回合應該可以全身而退。

捧最多次歐聯冠軍嘅皇馬首回合主場打和曼城3比3，雙方上屆交鋒，「銀河艦隊」首回合主場打和1比1，次回合作客慘吞曼城4蛋，睇往績形勢不妙

兩支英超球隊曼城、阿仙奴首回合都和波，上屆冠軍曼城次回合有主場之利，隨時重演上屆淘汰皇馬好戲，阿仙奴次回合作客拜仁慕尼黑，想擊敗呢支德甲剋星，並唔容易。