賓福特讓步減價　曼聯有望簽艾雲東尼

賓福特前鋒艾雲東尼獲得各大豪門垂青，會方曾經將佢標價為8,000萬鎊至1億鎊，但由於呢位28歲英格蘭國腳去意已決，加上只剩下1年合約，賓福特惟有讓步減價，只要求4,000萬鎊(約3.9億港元)轉會費，曼聯準備出手收購。

艾雲東尼雖然因為違規賭波，被罰停賽8個月，但今年1月中復出後，保持水準，上陣13場英超入4球，並喺上月國際熱身賽為英格蘭上陣，射入比利時大門，預料有望為「三獅兵團」參加今屆歐國盃，佢早前講笑話希望為英格蘭捧盃之後，轉投皇馬。

不過，皇馬冇興趣簽入艾雲東尼，英國《太陽報》指阿仙奴亦退出爭奪艾雲東尼，曼聯、車路士、韋斯咸成為最大潛在買家，特別係紅魔鬼計劃今夏放走安東尼馬迪爾，加上拉舒福特長期狀態低迷，急需要簽入前鋒，將艾雲東尼列為首選，隨住賓福特願意減價，只取收4,000萬鎊轉會費，進一步增加交易成功可能性。