點睇得晒？下季歐聯18場同時間上演！

下季歐聯將會進行大改革，參賽球隊由32隊變為36隊，依家分8組嘅分組賽事亦會轉為「瑞士制」嘅聯賽模式，就連賽程安排亦有重大變動，最後一輪可能安排18場比賽同時間上演！

依家歐聯都會「斬件」進行，分組賽8組分兩日舉行，1晚最多都係得8場，但據英國《每日郵報》報道，由於新制係單一聯賽模式，如果最後一輪賽事分唔同時間舉行，會構成公平問題，所以考慮跟主流聯賽煞科戰做法，將最後一輪所有賽事安排喺同時間上演。

如果計劃落實，下季歐聯嘅聯賽階段最後一輪，將會有18場賽事一齊踢，球迷要揀波睇都咪話唔頭痛！