美斯傷愈「被迫」踢足全場　邁亞密慘敗出局

星期四(11日)朝早中冠盃8強次回合，首回合輸1比2嘅國際邁亞密，作客蒙特雷雖然有美斯傷愈復任正選，但難逃再輸1比3厄運，兩回合合計2比5慘敗出局。

上周首回合完場後，雙方喺球員通道發生衝突，蒙特雷助教直斥美斯係「魔鬼侏儒」，令今場賽事火藥味更濃。主場嘅蒙特雷整體實力更強，控制戰局下再入多3球，邁亞密嘅西班牙球星佐迪艾巴更失控，因同對手推撞兼魯莽犯規，喺78分鐘被逐離場。踢少個嘅邁亞密喺尾段破蛋亦無補於事，今場再輸1比3。

邁亞密正選陣容星味十足，不過後備力量單薄，而且近期受到傷兵困擾，今場後備席盡係年輕球員。教練馬天奴今場意外冇作出任何換人，令啱啱傷愈嘅美斯喺敗局已定下，仍要踢足90分鐘，馬天奴嘅決定受到猛烈批評。

呢位阿根廷主帥賽後解釋：「今場所有後備球員都非常年青，比賽嘅發展唔適合佢哋落場，所以先會出現咁樣嘅情況。」