一石二鳥　紅軍新帥人選或帶「新伊巴」加盟

近期盛傳士砵亭教練魯賓艾摩廉將於今夏轉投利物浦，接替高普，成為紅軍新領隊，呢位39歲葡萄牙少帥甚至可能帶埋有「新伊巴謙莫域」之稱嘅瑞典前鋒基奧基尼斯，一齊加盟利物浦，令球隊耳目一新。

士砵亭現時可以位居葡超榜首，除咗魯賓艾摩廉領導有方之外，基奧基尼斯亦功不可沒，呢位25歲前鋒今季聯賽上陣26場轟入22球，排射手榜第1位，如果計埋盃賽，更加係上陣42場入36球，效率極高，受到各大豪門垂青。

基奧基尼斯嘅經理人施天卡耶透露，上年夏天收到8間球會斟介呢位「新伊巴」，但佢最終選擇加盟士砵亭，主因係受到魯賓艾摩廉嘅戰術吸引，事實證明基奧基尼斯加盟士砵亭後，表現如魚得水。施天卡耶可能暗示一旦魯賓艾摩廉轉投利物浦，基奧基尼斯都願意追隨佢去英超。

事實上，基奧基尼斯對於英國球壇絕不陌生，因為佢加盟士砵亭之前，曾效力英冠球隊高雲地利3季。不過，士砵亭現時將基奧基尼斯標價為1億歐元(約8.4億港元)，利物浦要收購，並非易事。