曼聯球員笠帽練波　史高斯怒轟水平低

曼聯近3場聯賽不勝後，近日積極練波備戰周日(14日)凌晨作客般尼茅夫嘅聯賽，不過多位球星被影到笠住風帽嚟練波，結果被名宿史高斯炮轟，直指呢個畫面係曼聯訓練水平低嘅訊號。

曼聯日前進行操練，拉舒福特因傷未有參與，反而16歲翼鋒新星拉斯就被提拔跟操，但阿歷真度加拿祖、馬恩奧、雲比沙卡等球員，練波嗰陣就笠住風帽，名宿史高斯就喺社交網發炮：「我唔介意球員戴冷帽或者手套練波，但笠住頂風帽係冇可能練得好，球隊嘅水平係由訓練場開始......係咁先啦！」

唔少球迷批評史高斯係雞蛋挑骨頭，尤其阿歷真度加拿祖同馬恩奧都係今季曼聯表現最好嘅球員之一，史高斯冇耐之後亦將留言刪除。