利華古遜2比0贏韋斯咸　曼聯心淡！

周五(12日)凌晨歐霸盃8強首回合「德英大戰」，利華古遜展現「德甲1哥」本色，主場以2比0擊敗韋斯咸，晉級形勢大好。今場比賽亦關乎德甲同英超競爭下季「歐聯第5席」，經過今輪歐洲賽後，德甲將同英超嘅分數差距拉開，曼聯想搶第5名踢歐聯嘅美夢未必可以實現。

利華古遜今場壓住韋斯咸狂攻，埋門紀錄係32對1，不過主隊就射極唔入，直到83分鐘先由莊拿斯荷夫曼打破僵局，補時1分鐘再由邦尼菲斯頭槌頂成2比0，帶住2球優勢作客韋斯咸好踢好多。利華古遜下場聯賽贏波就喺德甲封王，德盃亦已殺入決賽，大有機會成為「3冠王」。

利物浦同韋斯咸喺歐霸盃齊輸波，阿仙奴同曼城喺歐聯亦只係打和，今輪英超只有維拉喺歐協聯2比1贏里爾搶分。利華古遜今場為德甲直接K.O英超球隊後，最新積分排名係意甲(18.714)、德甲(16.928)同英超(16.875)。隨住利物浦同韋斯咸面臨出局，英超原有嘅「仍然參賽」隊數優勢隨時消失，超越德甲唔樂觀。