紅軍輸波海倫致賀　加歷查：睇到慘敗嘅好處

利物浦喺歐霸盃8強首回合慘敗，表現令球迷失望，不過「紅軍」名宿加歷查就相當樂觀，認為今場大敗可以令球隊專心英超爭霸，更呼籲領隊高普喺下星期次回合盡派後備，瞓身搶英超冠軍。至於曼聯前鋒海倫，就出文祝賀舊東家阿特蘭大贏波。

加歷查喺社交網表示：「嚇死人嘅戰果同表現，大敗嘅唯一安慰，就係高普喺次回合一定要用晒後備球員去踢，將全部力量放喺英超上面！」利物浦周日(14日)聯賽會迎戰水晶宮，下周中次回合之後，會喺21號作客富咸。阿特蘭大踢出漂亮一仗，上季仲效力阿特蘭大嘅曼聯前鋒海倫亦喺社交網貼相祝賀，留言「Mola mia」(永不放棄)。

高普賽後被問到次回合嘅策略，呢位德國主帥就拒絕透露：「我依家冇心情諗下個星期嘅比賽，尤其中間仲有場聯賽。我會等下星期一先再睇番呢場波，我哋可唔可以贏阿特蘭大？有可能。贏唔贏到3比0？唔知，但如果繼續係今場嘅表現就冇可能。」