英超終用半自動越位檢測　一個決定再捱鬧

英超雖然貴為全球最受歡迎聯賽，不過喺執法水平方面一直落後，其中已被各大聯賽採用嘅「半自動越位檢測技術」，季前被離奇否決引入後，英超賽會終於喺周四(11日)宣布，下季將會正式採用呢個系統，不過竟然趕唔切喺開季啟用，認真離譜！

「半自動越位檢測技術」喺2022世盃應用後，獲得一致好評，據報新技術採用後，對越位嘅判決比現時VAR快至少半分鐘，最重要係更加準確。不過英超賽會指出，由於要喺20個球場安裝鏡頭、選擇供應商同進行測試等程序，新技術要等到9月、10月或11月其中一個國際賽期後先可以啟用，意味下季開季都繼續要靠VAR判定越位。

前英超球證希斯對呢個做法極為不滿：「真係笑死人，英超咁有錢，竟然唔可以喺開季第1日就用呢項新技術，要等開季1、2個月先至用到，咁會影響賽事嘅公平性，不如等到25/26球季先全面引入啦！」