錫菲聯被扣2分　點解唔係今季執行？

繼愛華頓同諾定咸森林之後，再有英超球隊因財務問題被扣分，依家排包尾嘅錫菲聯被指拖欠其他球隊金錢，將會被扣2分，不過扣分唔會喺今季執行，而係要等到錫菲聯下次再參加英冠嗰陣先扣。

英格蘭足球聯盟(EFL)周五(12日)宣布，錫菲聯喺22/23球季因拖欠其他球會金錢問題嚴重，累積「拖數」日期超過550日，所以罰佢哋扣2分，另外再有2分扣分會緩刑執行。

由於EFL係管理英冠、英甲、英乙嘅機構，同英超嘅管理賽會唔同，所以扣分唔會喺錫菲聯踢緊英超期間出現，要等佢「回歸」EFL管轄嘅聯賽先可以執行。

錫菲聯目前喺英超只得16分排包尾，距離尾4嘅諾定咸森林9分，護級機會渺茫，下季好大機會就要跌落英冠「服刑」。