華拉尼又抖「數星期」　已踢曼聯最後一仗？

曼聯今季傷兵問題日日新鮮，球會宣布法國中堅華拉尼因肌肉問題，將要休息「數個星期」，喺距離今季煞科只剩5個星期下，華拉尼有冇機會再上陣仍係未知數，由於佢夏天約滿，隨時已經踢完佢紅魔生涯最後一仗。

曼聯周四(11日)更新傷兵情況，華拉尼喺對車路士一戰半場傷出後，證實肌肉受傷要抖數個星期，另一中堅莊尼伊雲斯喺同一場受傷，不過肌肉問題只係「短期性」，只會缺陣周日(14日)凌晨作客般尼茅夫嘅聯賽。連同早前受傷嘅利辛度馬天尼斯、域陀連迪路夫、勞基梳爾同麥湯米尼，曼聯中後場繼續以殘陣出戰。

月底就31歲嘅華拉尼夏天約滿，曼聯已否決啟動續約條款，意味呢位法國中堅將要另覓球會落班，如果佢趕唔切喺煞科戰前康復，3比4輸畀車路士場波就成為佢嘅曼聯告別戰。