利物浦奪英超歐霸要畀1.96億　可以慳番

利物浦今季如果再贏得英超同歐霸盃兩個冠軍，就要為去年夏天簽入阿歷斯麥亞里士打，額外支付2,000萬鎊(約1.98億港元)畀白禮頓，不過「紅軍」喺歐霸盃8強首回合主場淨吞阿特蘭大3蛋，睇嚟呢筆錢可以慳番。

《Football Insider》報道，白禮頓日前公布22至23年財政報告，錄得英超紀錄嘅1.28億鎊利潤，當中提到會有額外4,000萬鎊收入，分別來自阿歷斯麥亞里士打、比蘇馬同古古列拿轉會，其中阿歷斯麥亞里士打去年夏天轉投利物浦，轉會費只係3,500萬鎊，但合約附設獎金條款，如果利物浦贏到英超同歐霸盃，就要再畀2,000萬鎊白禮頓。

利物浦現時喺英超排第2，但歐霸盃剛告大敗，喺8強首回合主場0比3輸畀阿特蘭大，嚟緊次回合作客，至少要贏3球先有晉級機會，領隊高普賽後已表示「忘記歐霸盃」，即係話阿歷斯麥亞里士打呢筆獎金暫時可以慳番喇。