曼聯鬧中堅荒　提拔18歲跑步冠軍應急

曼聯防線傷兵滿營，除咗最新華拉尼因為肌肉問題，將要休息數個星期之外，莊尼伊雲斯、利辛度馬天尼斯、域陀連迪路夫亦正在養傷，領隊坦哈格現時手上只有哈利馬古尼、19歲小將甘華拉2位中堅可用，所以緊急提拔18歲青年軍球員積克京頓上一隊跟操，並有望入選大軍名單，出戰周日(14日)凌晨英超作客般尼茅夫。

曼聯上場英超對利物浦，已經要焗用一老一嫩中堅組合哈利馬古尼、甘華拉扼守中路，最終被對手逼和2比2。本來防守中場卡斯米路有能力客串中堅，但由於另1位防中麥湯米尼有傷在身，唔可以抽調卡斯米路墜後踢中堅，坦哈格惟有向青年軍球員埋手，搵來積克京頓幫拖。

根據英國傳媒介紹，身高1米85嘅積克京頓屬於「運動天才」，打欖球出身，其後「轉行」踢波，曾經司職前鋒及中場，後來改踢中堅。積克京頓仲係1位田徑好手，曾經喺博爾頓錦標賽奪得75米、150米、600米跑步金牌，可以話係集力量同速度於一身，值得令人期待。