曼聯唔死心　第三度斟介拉比奧特

曼聯今季2位中場新兵美臣蒙特、蘇夫恩岩拉伯特表現令人失望，卡斯米路狀態大不如前，加上基斯甸艾歷臣將會離隊，最新消息指紅魔鬼計劃再次出手斟介祖雲達斯中場拉比奧特，填補空缺，皆因呢位29歲法國國腳將於今夏約滿，可令球會節省轉會費支出，以免違反英超公平財政條例。

曼聯曾於2022年及上年夏天，試圖簽入拉比奧特，但兩次都未能成功，不過呢位「壞孩子」上年夏天只係同祖雲達斯續約1年，意味今夏又會恢復自由身。雖然祖記有意開出新合約，但拉比奧特要求15萬鎊(約146萬港元)周薪，令呢支意甲勁旅卻步，一直未能達成協議。

據悉拉比奧特嘅經理人開始接觸英超各大球會，推薦拉比奧特，曼聯有興趣簽佢，認為係代替基斯甸艾歷臣最佳人選。拉比奧特今季為祖記上陣27場入4球及3次助攻，佢一直對於轉投英超球會持開放態度，加上曾於曼城青年軍受訓，對曼徹斯特絕不陌生，今次或者有機會同曼聯一拍即合。