伊沙克起孖　紐卡素炒熱刺4蛋

周六晚(13日)英超早場，主場出擊嘅紐卡素憑阿歷山大伊沙克起孖，大炒熱刺4比0，聯賽2連勝，爭奪來季歐洲賽資格仲有價講，熱刺全失3分後，與阿士東維拉同得60分，但得失球差不及對手跌落第5。

作客嘅熱刺貫徹喪攻踢法，反客為主搶攻，紐卡素逼搶戰術奏效，30分鐘安東尼哥頓送助攻，阿歷山大伊沙克為「喜鵲」先開紀錄，2分鐘後紐卡素一次前場逼搶，熱刺後柏度樸路受壓下回傳失誤，安東尼哥頓門前冷靜扭過雲迪尹射遠柱成2比0領先半場。

易邊後局勢不變，熱刺繼續搶攻力求破蛋，而愈踢愈順嘅紐卡素再喺51分鐘，由阿歷山大伊沙克接應般奴古馬雷斯妙傳，單刀射成3比0，個人聯賽累積17球，同利物浦嘅穆罕默德沙拿並列射手榜第3位。

其後熱刺變陣，收起隊長孫興民，換入古路施夫斯基，迪姆華拿篤前打中鋒，但冇乜作用，反而87分鐘法比安舒哈一次頭槌攻門，為紐卡素頂成4比0完場。