法國定出歐國盃冠軍獎金　略低於世盃

法國隊兩年前在卡塔爾世盃獲得亞軍，每名球員收到49萬歐元獎金，歐國盃就快到，法國足總定出冠軍獎金，就係每人可得47萬歐元(約390萬港元)，比兩年前嘅世盃亞軍只係低少少。

《隊報》報道，球會薪酬近年暴升，法國足總冇再將國家隊獎金提高太多，2018世盃冠軍每人獲得獎金係28萬歐元，2022世盃亞軍就加到49萬歐元，歐國盃獎金略低於世盃亦屬正常。

據報，多位法國隊主力都唔介意獎金多少，佢哋更關心肖像權，呢個範疇先係搵真銀，為此法國隊主力最近同法國足總簽下一項為期4年嘅新協議，以保證未來幾年嘅肖像權收益。

至於冠軍獎金，法國足總定為每名球員47萬歐元，法國隊係1984及2000年兩屆冠軍，今屆法國隊被列作奪標次熱門，僅次於大熱門嘅英格蘭，兩年前卡塔爾世盃飲恨，已經顯示實力，今屆捧盃機會唔細。