皇馬巴塞齊入世界波　下輪國家打吡決戰

周日(14日)凌晨西甲，頭兩位勁旅皇家馬德里、巴塞隆拿分途出擊不約而同，憑1球世界波，作客小勝1比0而回，雙方繼續保持8分距離，兩軍將於下輪聯賽交鋒，成為今季冠軍誰屬最關鍵一戰。

榜首皇馬將於嚟緊周四(18日)凌晨歐聯8強次回合作客曼城，今場聯賽有所留力，正選陣容收起2位射手雲尼斯奧斯祖利亞、洛迪高高斯，結果上半場只有3次射門，並且唔中目標。換邊後僅3分鐘，中場曹亞文尼離門大約30碼遠射入世界波，為皇馬打開紀錄，並一直保持領先至完場。皇馬今季各項賽事有7次贏1比0，屬於2019/20年球季以來最多，主帥安察洛堤「煲魚生粥」戰術奏效。

另外，巴塞隆拿將於嚟緊周三(17日)凌晨歐聯8強次回合主場對巴黎聖日耳門，今場西甲憑祖奧菲歷斯倒掛金勾入波，以1比0擊敗卡迪斯，取得聯賽4連勝，落後皇馬8分，雙方將於4月22日凌晨交鋒，如果巴塞要保持爭標希望，就非勝不可。