冇C朗就冇運行　費蘭度山度士又被炒

土耳其球隊比錫達斯宣布解僱教練費蘭度山度士，結束雙方3個月賓主關係，呢位69歲名帥自從2022年年底離開葡萄牙國家隊之後，先後執教波蘭國家隊、比錫達斯，都係短時間內被炒，遭網民嘲諷，冇咗C朗「指導」，佢就唔識教波。

費蘭度山度士今年1月7日接手執教比錫達斯，領軍16場比賽，只取得7勝4和5負，排聯賽第4位，落後榜首加拉塔沙雷36分，會方忍無可忍，唔等球季結束，就決定炒費蘭度山度士。

費蘭度山度士曾經執教波圖、士砵亭、賓菲加、AEK雅典、希臘國家隊等球隊，最威水係2014至22年執教葡萄牙國家隊期間，奪得2016年歐國盃冠軍，但上屆世界盃結束後下台。

費蘭度山度士上年1月接手執教波蘭國家隊，但僅9個月就被炒，今次執教比錫達斯時間更加短，只有3個月貨仔。