里奧費迪南「捧殺」雲迪尹　四腳朝天圖瘋傳

力爭英超前4名嘅熱刺，星期六(13日)作客紐卡素慘吞4蛋，今季一直表現出色嘅荷蘭中堅雲迪尹，開波前被曼聯名宿里奧費迪南瘋狂吹捧，大讚係「勞斯萊斯」級別中堅，點知今場大出洋相，一張畀玩到「四腳朝天」圖片更被網民瘋傳，認真尷尬。

紐卡素30分鐘開紀錄一球，阿歷山大伊沙克簡單一扣，全速回追嘅雲迪尹即被呃到跣低，四腳朝天一幕成為阿歷山大伊沙克入波嘅「背景」，1分鐘後安東尼哥頓為紐卡素再入1球，雲迪尹再一次被玩到瞓低，成為熱刺輸波罪人。

原來里奧費迪南開波前曾「捧殺」雲迪尹：「佢係中堅入面嘅勞斯萊斯，有機會成為世界最佳後防之一！」呢番言論喺半場期間被網民恥笑後，里奧費迪南亦公開回應：「勞斯萊斯有時都有出現技術故障，間唔會要入廠檢查一下嘅！」