「高普」領軍巴塞全勝　沙維接班人已在陣？

巴塞隆拿自沙維宣布季尾離任後，球隊成績脫胎換骨，周日(14日)凌晨作客1比0贏卡迪斯後拎到6連勝，不過呢場比賽沙維停賽缺陣，由佢阿哥奧斯卡靴南迪斯代為領軍，花名「高普」嘅佢亦保持執教巴塞100%勝率，唔少球迷都覺得佢就係沙維最佳接班人！

因外貌同利物浦領隊高普相似，47歲嘅奧斯卡靴南迪斯被西班牙傳媒冠以「奧斯卡‧高普」嘅花名，佢喺2019年開始跟弟弟沙維搵食出任助教。自從沙維執教巴塞隆拿後，今仗係佢第7次缺陣，奧斯卡靴南迪斯7次客串領軍獲得住勝，保持100%勝率。

沙維多次強調唔會改變季尾離隊決定，唔少球迷認為由奧斯卡靴南迪斯接手，會係「平靚正」嘅選擇，不過西班牙《阿斯報》消息指，奧斯卡靴南迪斯好可能會跟埋沙維一齊離開，巴塞傾向聘請更有經驗嘅教練，指奧斯卡靴南迪斯接任機會少於20%。