爆大冷！利物浦不敵水晶宮爭標處下風

周日（14日）晚英超頭場焦點戰，近況跌Watt嘅利物浦非常唔順，最終喺晏菲路主場以0比1不敵水晶宮，對爭標打擊甚大。

利物浦上周中歐霸8強首回合喺主場慘吞阿特蘭大3蛋，主帥高普今仗出番王牌穆罕默德沙拿同路易斯迪亞斯擔正攻堅，但球隊明顯有疲態，一開波畀水晶宮反客為主，泰歷米素爾於左路橫傳，伊比爾治伊斯喺禁區冇人看管下快射破網，先開紀錄。其後利物浦雖然搶番主動權，但谷極都谷唔起，路易斯迪亞斯於窄位埋門過唔到甸恩軒達臣，半場落後1粒。

易邊後利物浦即換入蘇保斯拉爾加強攻力，點知輪到新仔干拿巴特利亦告傷出，由啱啱好番嘅阿歷山大阿諾特入替，不過未見有太大起色，高普再換入加普同迪亞高祖達，祖達出場冇耐即有機會，接應蘇保斯拉爾橫傳近射，畀尼達利基尼護空門撲出，居迪斯鍾斯更單刀唔入，最終紅軍以1球飲恨，爭標路上益晒曼城同阿仙奴。