雙重打擊！奧迪加特負傷離場　歐聯上陣成疑

阿仙奴喺英超吞阿士東維拉2蛋，爭標機會大打折扣，最慘係隊長馬田奧迪加特比賽尾段傷出，領隊阿迪達拒絕透露傷患詳情，周四(18日)凌晨歐聯8強次回合對拜仁慕尼黑上陣成疑。

阿仙奴今仗全隊表現低迷，唯獨奧迪加特「滿場飛」撐起球隊，不過喺79分鐘仲係0比0嗰陣，奧迪加特就退下火線由伊美路維入替，結果佢離場後球隊即連失2球輸波。

賽後阿迪達被問到呢個換人，阿迪達表示：「奧迪加特覺得有唔妥，佢隻腳出現問題，唔能夠繼續比賽，呢個係換走佢嘅原因。」不過阿達達就拒絕透露更多詳情，英國《太陽報》消息指呢位挪威中場未必趕得切對拜仁慕尼黑上陣。

阿仙奴喺8強首回合2比2逼和拜仁慕尼黑，對方上場聯賽亦有京士利高文受傷肯定缺陣。