羅馬中堅疑似心臟出事送院　賽事腰斬

周一(15日)凌晨意甲烏甸尼斯主場對羅馬，幾乎搞出人命，羅馬中堅安迪卡踢到70分鐘，突然按住胸口倒地，需要立即送院治療，球證徵詢兩隊教練意見之後，同意腰斬比賽，當時踢成1比1，補賽事宜仍然有待安排。

開賽23分鐘，羅馬中堅甸恩曉贊犯錯，被烏甸尼斯羅拔圖佩雷拉逼甩腳下球，形成單刀之勢射入，其後盧卡古頂入為羅馬扳平1比1。戰至70分鐘，安迪卡突然倒地，用手按住胸口，神情非常痛苦，軍醫立即入場進行急救，最後需要用擔架將呢位24歲科特迪瓦國腳抬離場。賽事因為今次突發事件，暫停近15分鐘，最終兩隊都同意腰斬比賽。

羅馬會方發表聲明，指安迪卡一直保持清醒，已經送往醫院接受進一步檢查，情況有明顯好轉，精神唔錯，全隊球員都有去醫院探望佢，將繼續密切留意安迪卡嘅身體狀況。