國米意外失分　等打吡戰捧盃？

周一(15日)凌晨意甲爆大冷，榜首國際米蘭主場出擊，被卡利亞里逼和2比2，搞到1.08倍主W都開唔出。不過，國米將於下場聯賽鬥次席AC米蘭，只要贏出呢場「米蘭打吡」，就可以提早捧盃，似乎已有晒劇本。

國米射手拿達路馬天尼斯停賽，教練施蒙尼恩沙基今仗派出老將阿歷斯山齊士擔任正選，拍住馬古斯杜林，兩人擦出火花，開賽12分鐘，A山傳中，馬古斯杜林近門射入打開紀錄。

國米繼續創造唔少攻門，但遲遲未能拉開紀錄，更於64分鐘被卡利亞里前鋒蘇梅洛度夫射入扳平。其後卡利亞里中堅耶利文拿「送禮」禁區內犯手球，被吹罰12碼，查漢奴古主射入網，為國米再度領先。不過，國米82分鐘防線出錯，被卡利亞里中場維奧拿射入逼和2比2。

由於第2位AC米蘭作客只能逼和薩斯索羅3比3，仍然落後國米14分，今季意甲餘下6輪聯賽，換言之國米只要下仗擊敗A米，就可以提早5輪奪冠。