多蒙特意乙尋寶　睇中「平價版辛祖」

德甲勁旅多蒙特今年1月向曼聯借用查頓辛祖，不過佢嘅表現未能回復當年水準，而且曼聯叫價5,000萬鎊亦超出多蒙特預算。據報「蜜蜂兵團」已決定打退堂鼓，近日轉向意乙聯賽尋寶，準備收購「平價版辛祖」、羅馬尼亞國腳丹尼斯文。

意大利媒體《TuttoMercato》報道，效力意乙榜首帕爾馬嘅丹尼斯文，已被多蒙特列為頭號獵物，呢位右翼今季已有11個入波同5次助攻，傳波同創造力上乘，踢法同查頓辛祖有幾分相似，多蒙特睇中丹尼斯文，明顯就係打消收購查頓辛祖嘅計劃。

25歲嘅丹尼斯文3年前由布加勒斯特星加盟帕爾馬，轉會費已達1,100萬歐元，不過佢同球會合約只剩1年幾，多蒙特有望「壓價」，預計1,500萬歐元至1,800萬歐元就可以成交。