前曼聯球星赴英密斟阿仙奴　傳做阿迪達副手

英超勁旅阿仙奴近年成績起飛，不過去到季尾關鍵時刻經常甩轆，據報「兵工廠」為進一步加強實力，正斟介曾效力曼聯、皇馬等豪門嘅阿根廷名將軒斯加入教練團，甚至有機會出任領隊阿迪達嘅副手。

現年45歲嘅軒斯，球員時代踢過曼聯、巴黎聖日耳門、皇家馬德里、馬賽等名牌，佢喺2001年效力巴黎聖日耳門嗰陣，正正就係同阿迪達做隊友，估唔到超過20年後有機會再度合作。

軒斯執教經驗豐富，退休後做過沙士菲、小阿根廷人、紐維爾舊生等阿甲球會主帥，亦去過美職教阿特蘭大聯，據報聖羅倫素亦向軒斯開出合約，不過佢目前身處英格蘭同阿仙奴談判。

據報軒斯寧願放棄主帥工作，優先選擇重返英超加入阿仙奴，由於阿迪達助教史杜雲保盛傳會喺夏天離開，尋求做主帥嘅機會，軒斯或會取代佢做「第2把交椅」。