睇死坦哈格今夏落鑊　曼聯球員推遲決定未來

曼聯上場對般尼茅夫又失分跌落第7，另邊廂阿士東維拉今輪贏波，同前4拉開到13分，據報隊內相信，領隊坦哈格季尾將被辭退，多名主力紛紛推遲對自己未來嘅決定，實行靜觀其變。

《曼徹斯特晚報》報道，曼聯有多名一線球員合約會於今夏到期，不過大家都唔心急續約或搵班落，因為隊內已有共識，就係坦哈格季尾將被辭退，來季會有新主帥上場，球員都想觀察球隊變化再作決定。

報道又指，曼聯新股東拉特克利夫拒絕保證坦哈格來季繼續任教，英力士集團更不時傳出同新帥候選者有接觸，高層各種舉動，都對隊內球員決定自己未來有重大影響，大家都想了解一下，曼聯換帥後會有咩變化。

至於今夏合約到期嘅球員，計有湯希頓、莊尼伊雲斯、蘇夫恩岩拉伯特、安東尼馬迪爾同華拉尼，尚餘1年合約嘅就有哈利馬古尼、域陀連迪路夫、甘華拉、雲比沙卡、麥湯米尼、基斯甸艾歷臣同阿密特迪亞路。