曼聯遲遲唔續約　國米今夏平價搶雲比沙卡

曼聯雖然成績差，但其實隊中有唔少好球員，只係用不得其法，例如一度被邊緣化嘅邊路後衞雲比沙卡，近日再被國際米蘭睇中，據報該隊打算今夏以1,500萬歐元(約1.26億港元)平價收購。

雲比沙卡2019年以當時總值5,000萬鎊轉會費由水晶宮轉投曼聯，不過呢幾年亦係「紅魔鬼」最動盪時期，近兩季更因為傷病同踢法問題，雲比沙卡上陣時間大幅減少，領隊坦哈格一度將佢列入清洗名單。

呢位26歲守將同曼聯尚餘1年合約，由於遲遲未續約，曼聯有可能今夏將佢出售，避免人財兩失，國米就睇準機會撬人，《米蘭體育報》報道，國米打算簽入雲比沙卡，以取代即將以3,000萬歐元高價出售嘅荷蘭國腳杜費斯。

國米認為，雲比沙卡技術、速度、經驗都達標，而且身價大跌，預計1,500萬歐元就可簽入，而且雙方去年夏天已有過接觸，相信今次再傾成事機會唔細。