安察洛堤父子档拆伙　细安下季或执教西维尔

皇马主帅安察洛堤教波功力深厚，跟住佢担任助教嘅囝囝大卫安察洛堤，自然喺爸爸身上学到唔少嘢，根据皇马随队记者蒙迪爆料，“细安”学有所成，打算下季独立发展，可能执教另一支西甲球队西维尔，同老窦打对台。

现年34岁嘅大卫安察洛堤出身于AC米兰青训系统，但从未为一队上阵，仅效力过意大利低组别球队，而且20岁就挂靴，由2016年开始追随安察洛堤。“肥安”执教拜仁慕尼黑、拿玻里、爱华顿，皇马，都由大卫担任助教。据悉拥有运动科学学位嘅“细安”擅长数据分析，平时为爸爸提供唔少意见，两父子互补长短。

不过，“细安”唔想一直靠父荫，上年7月已考取欧洲足协教练牌，为将来做主帅铺路，准备今夏离开皇马。由于安察洛堤名气够响，据悉西维尔及几支英超球队都有意邀请“细安”领军。

安察洛堤亦为囝囝“助攻”，大赞佢可以成为出色教练：“大卫性格严肃，目前负责我哋教练团大部份工作，佢同我有相似执教理念，经验亦愈来愈丰富，我认为佢有能力成为名帅，佢现时系我嘅助教，话唔定有朝一日，我反过来做佢嘅助教。”球迷下季随时可以睇到安察洛堤父子喺场上交锋。