列斯聯如果升班　想借回加雲菲臘斯

現居英冠第3位嘅列斯聯，如果成功升班，將會向曼城提出借回自家青訓產品加雲菲臘斯，不過相關費用要再傾。

《每日郵報》報道，曼城於2022年以4,200萬鎊轉會費，由列斯聯簽入加雲菲臘斯，可惜呢位英格蘭中場長期受傷，好番後表現愈踢愈沉，今年初被外借到韋斯咸，但表現持續低迷，仲連累「錘仔幫」失咗好多分，預計今夏將會退回曼城。

報道指曼城打算將加雲菲臘斯出售或再外借，轉會費定價3,000萬鎊，但相信冇其他球會接貨，只有母會列斯聯願意出手，不過前題係列斯聯能夠重返英超。

就算升班，列斯聯都無力承擔3,000萬鎊轉會費，只會提出借用，而加雲菲臘斯高達15萬鎊周薪亦係一大問題，到時要再同曼城及球員商議。