巴塞自爆！麦巴比率PSG绝地反胜入4强

周三(17日)凌晨欧联8强次回合，上演惊天逆转好戏。巴塞隆拿主场出击大好形势下，离奇“自爆”送出1张红牌同1个12码，令巴黎圣日耳门(PSG)得以绝地反扑，连入4球反胜4比1，两回合合计赢6比4杀入4强。PSG晋级后将会对德甲嘅多蒙特，争夺决赛资格。

巴塞首回合作客赢3比2，今仗返主场有个极佳开局，拉芬夏比洛尼12分钟接应耶马传中近门射入，总比数领先2球。巴塞大好形势下崩溃，序幕出现喺29分钟，朗奴阿拿奥祖禁区边将单刀嘅巴高拿拉跌，被球证出示红牌赶走；踢多个嘅PSG喺40分钟即由奥士文尼迪比利劲射破网。

换边后PSG继续狂攻，域天拿54分钟远射得手反超前2比1，总比数追和4比4；7分钟后巴塞再有致命失误，祖奥简斯路禁区内鲁莽踢跌奥士文尼迪比利输12码，麦巴比操刀射入反胜1球(总比数5比4)。巴塞尾段尽地一煲抢攻，更被PSG反击由麦巴比再入1球，落得出局命运。

巴塞教练沙维喺4比4(总比数)嗰阵，因投诉过激兼踢烂广告板被逐，佢赛后将出局归咎于球证执法：“我好嬲，红牌之前我哋踢得好好，呢张红牌太严厉，我哋全季努力就因为球证误判而结束，我同球证讲佢嘅表现系耻辱同灾难，我唔锺意讲球证，但今次唔可以再唔出声。”