劇情3度逆轉！多蒙特神奇踢走馬體會

歐聯8強次回合峰迴路轉，除巴黎聖日耳門絕地大反擊外，多蒙特周三(17日)凌晨淘汰馬德里體育會亦曲折離奇！首回合輸波嘅多蒙特，今仗經歷反勝、被反勝後再終極反勝，劇情3度逆轉下贏4比2，兩回合合計5比4淘汰馬體會，相隔11年後再入歐聯4強。

多蒙特首回合作客輸1比2，不過佢哋主場氣勢驚人，上場半就由祖利安白蘭特同伊恩馬特臣入波領先2比0(總比數多蒙特領先3比2)。馬體會下半場急起直追，49分鐘靠曉姆斯烏龍波追番粒，64分鐘再由安祖哥利亞入波追平(總比數馬體會領先4比3)。多蒙特並冇洩氣，71分鐘由富克洛頭槌頂入，3分鐘後再有沙比薩射入致勝球，帶領多蒙特贏4比2，兼喺總比數反勝5比4晉級。

多蒙特自12/13球季後，再一次殺入歐聯4強，將會同巴黎聖日耳門爭入決賽，教練泰錫賽後表示：「我覺得非常自豪，今仗出現兩個可能打沉意志嘅時刻，但球員表現好堅強，就算面對馬體會咁強嘅球隊，我哋都係值得晉級嘅一隊！」