曼聯棄卒做好戲！沙比薩係多蒙特「真MVP」

德甲勁旅多蒙特喺歐聯殺入4強，真係要多謝曼聯「走寶」，講緊唔係1月由曼聯借用嘅查頓辛祖，而係季前被坦哈格放棄嘅中場沙比薩。呢位奧地利國腳喺8強次回合對馬體會，交出1入波同2助攻，就連被歐洲足協選為MVP嘅祖利安白蘭特，賽後都話沙比薩先係「真‧MVP」。

曼聯上季向拜仁慕尼黑借用沙比薩，本來可以用1,500萬鎊將佢買斷，不過坦哈格最終選擇用5,500萬鎊收購美臣蒙特，令多蒙特冷手執個熱煎堆。呢位30歲中場攻守兼備，今季歐聯已交出4次助攻，近2場比賽入3球，喺季尾衝刺時刻進入巔峰狀態。

被歐洲足協選為今場MVP嘅祖利安白蘭特，賽後亦主動「讓獎」：「今場比賽好瘋狂，全世界球迷都會覺得好精彩，好開心獲選為最佳球員，不過我認為沙比薩先係今場嘅MVP。」