阿拿奧祖成出局罪人　神秘手勢咩意思？

巴塞隆拿喺歐聯8強被巴黎聖日耳門(PSG)淘汰，中堅朗奴阿拿奧祖食紅牌成為最大罪人，佢離開球場嗰陣做出連串神秘手勢，引起網民熱烈討論，據報佢嘅手勢意思係「被打劫」，暗指球證趕佢出場係錯判。

喺巴塞總比數領先2球優勢下，阿拿奧祖29分鐘先係長傳交失被PSG反攻，再撞跌單刀嘅巴高拿而被逐，不過碰撞嘅程度係咪值得紅牌就有爭議。阿拿奧祖激烈投訴不果後，離場期間右手做出古怪扭動手勢，唔少網民都唔明，不過有熟悉南美文化嘅球迷指出，呢個手勢喺南美同拉丁美洲都經常出現，意思大約係「偷竊」、「打劫」，明顯斥責球證係「打劫巴塞」。

巴塞教練沙維賽後狠批球證執法，不過門將達史特根就話判罰無可厚非：「我唔會話呢張紅牌係錯判，阿拿奧祖當時係想搶波，但如果球證吹犯規，結果就一定係紅牌，球證的確有權吹阿拿奧祖犯規。」