阿拿奥祖成出局罪人　神秘手势咩意思？

巴塞隆拿喺欧联8强被巴黎圣日耳门(PSG)淘汰，中坚朗奴阿拿奥祖食红牌成为最大罪人，佢离开球场嗰阵做出连串神秘手势，引起网民热烈讨论，据报佢嘅手势意思系“被打劫”，暗指球证赶佢出场系错判。

喺巴塞总比数领先2球优势下，阿拿奥祖29分钟先系长传交失被PSG反攻，再撞跌单刀嘅巴高拿而被逐，不过碰撞嘅程度系咪值得红牌就有争议。阿拿奥祖激烈投诉不果后，离场期间右手做出古怪扭动手势，唔少网民都唔明，不过有熟悉南美文化嘅球迷指出，呢个手势喺南美同拉丁美洲都经常出现，意思大约系“偷窃”、“打劫”，明显斥责球证系“打劫巴塞”。

巴塞教练沙维赛后狠批球证执法，不过门将达史特根就话判罚无可厚非：“我唔会话呢张红牌系错判，阿拿奥祖当时系想抢波，但如果球证吹犯规，结果就一定系红牌，球证的确有权吹阿拿奥祖犯规。”