巴塞損失慘重　無緣世冠盃見財化水

西甲雙雄巴塞隆拿同馬德里體育會喺歐聯8強齊齊出局，相比之下巴塞「跌得更傷」，事關2隊正爭逐明年「加強版」世冠盃參賽資格，一齊出局嘅結果，令馬體會保住西甲第2隊參賽球隊席位，而巴塞就痛失5,000萬歐元(約4.1億港元)保底獎金。

新版世冠盃擴充至32隊，改為4年一度兼搬去夏天上演。明年第1屆賽事喺美國舉行，歐洲獲得12個參賽席位，除2021年至2024年嘅歐聯冠軍(車路士、皇家馬德里、曼城)直接出線，其餘位置會由近4年嘅歐洲排名系數決定，但每個地區最多只能夠有2支代表(冠軍除外)，皇家馬德里已佔西甲一席，巴塞如果今屆歐聯成績好過馬體會，就可以後上搶走第2個位，可惜依家兩隊同時「畢業」，馬體會就順利保住

世冠盃入場券。

西班牙傳媒計算，巴塞無緣4強已錯失1,250萬歐元晉級獎金，而世冠盃單係參賽獎金已達5,000萬歐元，對於財政出現嚴重問題嘅巴塞嚟講，今次出局真係損失慘重。