一山不能藏二虎！利物浦唔阻基利靴離隊

利物浦門將艾利臣比加喺2月受傷後，副選門將基利靴擔大旗表現出色，不過艾利臣上場聯賽傷愈立即重奪正選，意味基利靴又要長坐冷板。據英國傳媒報道，25歲嘅基利靴無意將球員生涯黃金時間浪費喺後備席，今個夏天將會要求離隊，而利物浦亦無意阻佢發展，已開始物色替補門將。

愛爾蘭門神基利靴一直係利物浦「盃賽門將」，領隊高普亦唔止一次大讚佢係世界級龍門，可惜艾利臣嘅地位難以撼動，基利靴想更上層樓就要另謀高就，據報些路迪同諾定咸森林都對佢非常有興趣，準備喺夏天正式提出收購。

英國《每日郵報》報道，利物浦無意強留基利靴，只要收到合適報價就會放人，而佢哋亦展開物色新嘅2號門將，目標係新特蘭嘅安東尼柏達臣，呢位23歲年輕門將轉會費預計為2,000萬鎊，阿仙奴、列斯聯等球會亦對佢虎視眈眈。