查頓辛祖願意重返曼聯　但有一個條件

剛協助多蒙特殺入歐聯4強嘅查頓辛祖，據報對於重返曼聯持開放態度，但有一個條件，就係坦哈格今夏必須離隊，呢位24歲翼鋒就願意重投「紅魔鬼」懷抱。

查頓辛祖季初因為被坦哈格批評操練懶散而交惡，出言反擊後被紀律處分踢出一隊，甚至禁止進入飯堂等羞辱性懲罰，結果冬窗被外借返母會多蒙特，查頓辛祖喺「蜜蜂兵團」重拾踢波樂趣，更協助球隊喺生死戰反勝馬體會，打入歐聯4強。

今場歐聯8強大戰查頓辛祖上陣86分，雖然並無入球，但創造兩次入球機會、兩次成功盤扭、5次重奪控球權，而多蒙特打入歐聯4強，已經超越曼聯2011年以來嘅歐聯紀錄。

之前有報道，曼聯今夏將會出售查頓辛祖，標價3,000萬鎊(約2.9億港元)，不過《i news》報道，其實查頓辛祖仲想返曼聯，接近消息人士透露，如果坦哈格今夏離隊，曼聯有新帥上任，查頓辛祖願意重返奧脫福效力。

曼聯內部人士認為，查頓辛祖同坦哈格關係已經「無法挽回」，因此只有坦哈格離隊，查頓辛祖先有歸隊可能。