难以逾越！阿仙奴史上第5次被拜仁淘汰

周四(18日)凌晨欧联8强次回合，阿仙奴作客0比1不敌拜仁慕尼黑，两回合合计输2比3出局。今次系阿仙奴史上第5次喺欧联被拜仁淘汰，似乎系命中克星。“兵工厂”领队阿迪达赛后承认，球队喺顶尖赛事仍有不足，需要“交学费”。

首回合踢成2比2，两队今场明显踢得分外稳阵，具威胁嘅攻门镜头少之又少。换边后阿仙奴体能明显下降，拜仁开始搵到甜头，哥列斯卡曾头槌顶中柱，到63分钟拉菲尔古里路左边传中，甘美治冲前迎顶破网，阿仙奴尾段想谷亦有心无力，最终输波出局。

阿迪达赛后表示：“我哋14年未入过欧联8强，当中一定有原因，重返欧联当然想一步登天，但8强球队实力接近，一啲细节会主宰成败，而呢啲关键细节系我哋暂时未拥有，所以我哋需要学习。冇任何说话可以安慰，但我同教练都会陪住球员，好荣幸可以做佢哋领队，我会谂办法扶起佢哋，因为星期六又有另一场大战。”

阿仙奴5次喺欧联淘汰赛面对拜仁，全部都被淘汰出局，对上4次(2005、2013、2014、2017)都系16强被踢走，欧联史上只有皇马淘汰拜仁(6次)系更加“格食格”嘅对赛。