英超「團滅」近4年首次　歐聯第5席渺茫

隨住曼城同阿仙奴喺歐聯8強出局，今季英超4支歐聯代表慘被「團滅」，亦係近4年首次出現歐聯4強冇英超球隊嘅情況。至於英超同德甲為下季「歐聯第5席」嘅爭逐，德甲嘅優勢已非常明顯，英超想爬頭機會渺茫。

英超今季4支歐聯球隊，曼聯同紐卡素喺分組賽包尾「畢業」，曼城同阿仙奴亦喺8強奮戰出局，英超對上一次冇球隊入4強，已經要數到19/20球季，成個21世紀亦只有7屆冇英超球隊晉級準決賽。

下屆歐聯改制後，會有2個席位送畀今屆歐聯積分最高嘅2個聯賽，意甲已經肯定拎到1席，另一席位就由德甲同英超爭奪。8強次回合前德甲本來稍微領先，而英超就有參賽隊數優勢，但結果曼城同阿仙奴出局，反而德甲有拜仁慕尼黑同多蒙特晉級4強，依家德甲有17.642分，大幅拋離英超嘅16.875分，基本上大局已定。