夏蘭特大戰又腳軟　主動要求被換走

曼城喺歐聯8強出局，挪威前鋒艾寧夏蘭特表現繼續令人失望，繼首回合只得1次射門後，今仗佢5次攻門只有1次命中目標，而且兩回合加埋甩波次數(14次)，竟然多過佢成功傳球次數(11次)。加時戰前被換離場，原來亦係夏蘭特主動要求。

夏蘭特入球如麻，不過佢喺大戰嘅演出就備受批評，連同上屆歐聯4強交鋒，夏蘭特近4次對皇馬錄得0入波、0助攻。德國《轉會市場》網站統計，夏蘭特今季面對英超前4名球隊，6場比賽亦只係入過1球，關鍵時刻似乎交唔到貨。

曼城喺加時展開前，用祖利安艾華利斯入替夏蘭特，領隊哥迪奧拿賽後解釋：「我哋踢緊一場神奇賽事，我本身就唔係太鍾意換人，不過夏蘭特、奇雲迪布尼同艾簡治都要求被換出，佢哋覺得唔能夠繼續比賽。」