尹佩斯出道在望　傳下季執教海倫芬

曾效力阿仙奴同曼聯嘅荷蘭前鋒尹佩斯，有望正式成為主教練，目前教緊飛燕諾U18嘅佢，據報獲另一荷甲球會海倫芬垂青，有機會喺今個夏天接掌帥印。

現年40歲嘅尹佩斯，掛靴後一直喺飛燕諾執教青年軍，佢亦多次表示目標係做主教練，原本佢想帶領母會飛燕諾，不過依家嘅飛燕諾主帥施洛短期內都冇計劃離開，如果尹佩斯唔想再等，就要另謀高就。

據荷蘭媒體《AD》報道，海倫芬已決定季尾同教練雲尹達倫「分手」，而尹佩斯就係佢哋頭號目標。據報尹佩斯之前曾拒絕曼聯領隊坦哈格邀請加入教練團，目的就係想自己執教一支球隊，海倫芬會係佢初試啼聲嘅機會。