薩格勒布「莫迪歷運動」　力邀傳奇回家

克羅地亞球星莫迪歷同皇家馬德里合約季尾完結，呢位38歲老將離隊機會極大，唔少球會都打呢位中場主意，其中佢嘅母會薩格勒布戴拿模就發起「莫迪歷運動」，全力游說呢位傳奇球星「回家」。

薩格勒布戴拿模早前喺西班牙《馬卡報》買咗全版廣告，上面印住莫迪歷10號波衫，並寫上：「加入我哋啦，呢件事好有意義。」新穎嘅挖角手法令唔少球迷拍爛手掌。近日薩格勒布戴拿模再出招，今次係喺市政府支持下，將一條10號電車線嘅總站改名「莫迪歷站」，令市民睇住呢架「10號莫迪歷」電車喺市內行駛。

莫迪歷今季喺皇馬仍然有高水準表現，據報多間沙特同美職球會都已向佢開出聘約，不過莫迪歷就想等今季結束後再慢慢決定，而且佢強調暫無退休打算，並會繼續為克羅地亞國家隊效力。