C朗追討欠薪「贏一半」　祖記賠970萬歐元

據意大利傳媒報道，葡萄牙球星C朗拿度早前就祖雲達斯欠薪進行索償，意大利法庭周三(17日)宣判，C朗嘅申訴「贏一半」，祖雲達斯將要向佢支付970萬歐元。

現年39歲嘅C朗，喺2018年至2021年間效力祖雲達斯，消息指喺疫情期間，祖雲達斯球員同意延遲發放4個月人工，C朗等部分高薪球員，另外再同球會達成延期出糧協議，不過C朗至今仍未收到有關款項，佢亦強調當時並冇同意「唔收」，所以向祖雲達斯索償1,950萬歐元。

意大利法庭認為雙方都要為事件負上責任，所以判祖雲達斯要支付一半嘅款項，大約為970萬歐元，另外加上利息及訴訟費。祖雲達斯表示會就今次判決作出商討，再決定係咪提出上訴。