巴塞出局爆內訌！阿拿奧祖同根度簡「和談」

巴塞隆拿喺歐聯8強被巴黎聖日耳門淘汰，中堅朗奴阿拿奧祖食紅牌成為出局罪人，賽後根度簡曾公開指摘阿拿奧祖「累事」，引起外界極大反應，消息指巴塞更衣亦出現分裂。為免事態惡化，據報球會已安排根度簡同阿拿奧祖「和談」，希望盡快平息分歧。

巴塞喺總比數領先2球下，阿拿奧祖喺29分鐘踢跌單刀嘅巴高拿被逐，令球隊踢少個下反勝為敗。根度簡賽後批評：「我寧願畀對手單刀，甚至失波都唔會走去犯規，如果佢唔100%肯定踢中個波，就唔應該出腳，咁早踢少個會殺死呢場比賽。」

根度簡嘅言論引起爭議，據報亦令更衣室出現分裂，阿拿奧祖周四(18日)被問到根度簡批評，佢亦冷漠回應：「我唔想講根度簡嘅評論，我有守則同價值觀要遵守。」記者追問係咪覺得根度簡批評違反守則，阿拿奧祖就話：「我已經答咗你嘅問題。」

根度簡老婆Sara亦喺社交網出文「救火」，指根度簡嘅意見只係想令球隊變得更好。據西班牙《每日體育報》報道，根度簡將同阿拿奧祖見面講清楚，希望化解當中矛盾。