歐洲3大盃賽4強全部誕生，各大聯賽勢力亦見分明。繼曼城同阿仙奴喺歐聯出局後，利物浦同韋斯咸喺歐霸盃亦步佢哋後塵，英超2日內4隊出局，亦係自14/15球季後，英超首次冇球隊出戰歐聯同歐霸盃4強。英超衰落，意甲就成為大贏家，佢哋下季甚至有機會有6隊出戰歐聯！

意甲喺今屆歐聯雖然成績麻麻，冇一隊可以晉級8強，不過喺歐霸盃同歐協聯就好爭氣，羅馬同阿特蘭大入歐霸盃4強、費倫天拿就入歐協聯4強。根據最新歐洲賽系數排名，一直領先嘅意甲提前鎖定今季前2名，拎到下屆(24/25球季)歐聯「第5個參賽席位」。

仲有一個情況，如果羅馬或者阿特蘭大贏到歐霸盃冠軍，而佢哋又入唔到意甲前5名，就會以「歐霸冠軍」身份出戰歐聯，成為第6支參加歐聯嘅意甲球隊。依家意甲前5位順序係國際米蘭、AC米蘭、祖雲達斯、博洛尼亞同羅馬，阿特蘭大排第6位。