【官宣】韋確斯成曼聯技術總監　辛祖回歸有望

曼聯正式宣布聘請韋確斯擔任技術總監，負責球隊招募、營運等工作，呢位53歲前布力般流浪翼鋒曾經擔任曼城青年軍教練及總監，有份栽培當時仍然屬於「藍月亮」小將嘅查頓辛祖，並非常欣賞呢位翼鋒，韋確斯成為曼聯高層之後，下季應該會收回辛祖，畀多一次機會佢證明實力。

韋確斯之前擔任修咸頓總監，據悉曼聯向呢支英冠球隊支付一筆賠償金，成功挖角請到韋確斯加盟，希望利用佢過去成功經驗，協助紅魔鬼重建。英國《太陽報》指韋確斯加盟曼聯，查頓辛祖成為最大得益者，因為韋確斯一直係辛祖嘅球迷，相信佢下季會向多蒙特收番呢位24歲英格蘭球星，而非出售佢。

不過，查頓辛祖同曼聯領隊坦哈格關係破裂，甚至可以話勢不兩立，韋確斯如何處理兩人關係，備受關注。